Yfirvöld í Austurríki hafa ákveðið að fara þá leið að láta óbólusetta í landinu sæta útgöngubanni. Bannið tekur gildi á miðnætti og mun vara í 10 daga til að byrja með. AP fréttastofan greinir frá og Vísir vakti athygli á málinu.
Útgöngubannið er liður í aðgerðum til að sporna við hraðri útbreiðslu COVID-19 í landinu. Felur bannið í sér að allir eldri en 12 ára mega ekki yfirgefa heimili sín nema til að sækja vinnu, versla í matinn, fara í göngutúr eða til að mæta í bólusetningu.
Yfirvöld óttast fjölgun andláta í faraldrinum sem og að heilbrigðiskerfið hætti að ráða við fjölda COVID-sjúklinga.
Kanslari Austurríkis, Alexander Schallenberg sagði við fjölmiðla í landinu í dag að það væri hlutverk yfirvalda að vernda þegna sína. „Þess vegna höfum við ákveðið að frá og með mánudeginum verði óbólusettir í útgöngubanni.“
Útgöngubannið mun ná til um 2 milljóna einstaklinga en börn yngri en 12 ára eru undanskilin þar sem þau mega enn ekki fá bóluefni.
Þeir sem brjóta gegn banninu eiga yfir höfði sér allt að 200 þúsund króna sektargreiðslur.
Austurríki er með eitt lægsta hlutfall bólusettra í vesturhluta Evrópu en aðeins um 65 prósent þjóðarinnar er fullbólusettur. Fleiri þúsund nýrra smita greinast á degi hverjum í Austurríki eða rúmlega 11 þúsund í gær. Smitstuðull meðal óbólusettra í landinu er um fjórum sinnum hærri en meðal bólusettra.
