Nýlega lést Victoria Strauss, 23 ára, í hörmulegu og undarlegu slysi í bílastæðahúsi í Columbus í Ohio í Bandaríkjunum. Þegar hún ætlaði að greiða fyrir bílastæðið, missti hún greiðslukortið sitt út úr bílnum. Hún hallaði sér þá út úr honum til að taka það upp en þá steig hún á bensíngjöfina og bíllinn fór áfram og höfuð hennar klemmdist á milli hans og kortavélarinnar.

The Columbus Dispatch skýrir frá þessu. Fram kemur að það hafi verið öryggisvörður sem kom að henni látinni. Upptökur úr öryggismyndavélum sýna að þetta gerðist um klukkan 23.30 á mánudag í síðustu viku.

„Hún reyndi að taka kortið sitt upp með því að opna dyrnar og halla sér út. Fyrir mistök steig hún á bensíngjöfina og bíllinn fór áfram og höfuð hennar lenti á kortavélinni,“ segir í yfirlýsingu sem lögreglan sendi frá sér.

Hún fannst ekki fyrr en um sex klukkustundum síðar og var þá látin.