Melinda og Bill Gates greindu frá því nýlega að þau hafi ákveðið að skilja eftir 27 ára hjónaband. Wallstreet Journal fjallaði um málið en í frétt þeirra kemur fram að Melinda hafi leitað ráða hjá lögfræðingi til að undirbúa skilnaðinn í október árið 2019. Á sama tíma var greint frá barnaníði og mansali Jeffrey Epstein. Greint hefur verið frá því að Bill hafi hitt Epstein á sínum tíma og er því talið að þetta tvennt geti tengst, það er að segja skilnaðurinn og fréttirnar um Epstein.

Samkvæmt heimildarmanni Wallstreet Journal, sem er fyrrum starfsmaður Bill and Melinda Gates Foundation, var Melinda áhyggjufull þegar það komst upp að Bill hafi hitt Epstein. Þá vill heimildarmaðurinn meina að það hafi verið stór ástæða fyrir því að Melinda leitaði ráða hjá lögfræðingi til að undirbúa skilnað við eiginmann sinn.

Talsmaður Bill á sínum tíma sagði að ástæða þess að hann hitti Epstein á sínum tíma hafi verið til að ræða góðgerðarstarfsemi. Bill hitti Epstein að minnsta kosti þrisvar sinnum í Manhattan árið 2011. Heimildarmaðurinn segir að Melinda hafi fyrst lýst yfir óánægju sinni með hittinga eiginmanns síns og Epstein árið 2013.

Sjá einnig: Samband Bill og Melinda Gates – „Hún átti aðra kærasta“