Herir Bandamanna í Sýrlandi og Írak luku nýlega við 10 daga hernaðaraðgerð þar sem ráðist var gegn liðsmönnum hryðjuverkasamtakanna sem kenna sig við Íslamska ríkið. Ráðist var úr lofti á um 100 felustaði hryðjuverkamanna í Írak. Talið er að tugir hafi látist.

Hersveitir Bandamanna berjast enn við um 10.000 liðsmenn hryðjuverkasamtakanna en tæp sjö ár eru liðin síðan stríðið gegn samtökunum hófst.

Að þessu sinni var aðallega ráðist á hella sem hryðjuverkamennirnir hafa dvalist í. Í kjölfarið munu íraskar hersveitir ráðast til inngöngu í þá. Vitað er að hryðjuverkamenn hafa haldið til í Makhmurfjalllendinu en það er mjög afskekkt. The Guardian segir að árásirnar hafi verið gerðar eftir margra mánaða undirbúning.