Ítalski mafíuleiðtoginn Guiseppe Fanara, sem er sextugur, afplánar nú lífstíðarfangelsisdóm í Rebibbia-fangelsinu í Róm. Þar hefur hann setið í níu ár. Hann afplánar samkvæmt sérstöku ákvæði um afplánun refsinga. Þetta ákvæði sviptir hann þeim réttindum sem fangar njóta venjulega og hann er í einangrun.

Ákvæðinu er aðallega beitt í alvarlegum málum tengdum mafíunni en einnig í málum afbrotamanna sem teljast mjög hættulegir og verða að vera í einangrun til að koma í veg fyrir að þeir geti haldið áfram að stýra brotastarfsemi úr fangelsinu.

Í júní brjálaðist Fanara, þegar fangaverðir komu til að skoða klefa hans, og réðst á sjö þeirra að sögn ítalska dagblaðsins Il Messager. Hann er sagður hafa bitið fingur af einum þeirra og fannst fingurinn ekki. Er því gengið út frá því að hann hafi borðað fingurinn. Um var að ræða litla fingur hægri handar.

Í kjölfarið var Fanara fluttur í öryggisfangelsið Sassari á Sardiníu.