Söngvarinn Josh Groban, sem er 39 ára, hefur fengið nálgunarbann á konu sem hefur ofsótt hann frá 2011. Hann komst í kynni við konuna á Facebook og þar döðruðu þau um hríð. Þau höfðu skipulagt að hittast en Groban varð að hætta við það vegna veikinda.

Þetta féll konunni illa og hefur hún síðan ofsótt hann með óviðeigandi skilaboðum, tölvupósti og sett sig í samband við ættingja hans.

TMZ skýrir frá þessu.

Fram kemur að konan hafi sent kynferðisleg skilaboð, djarfar myndir og mjög móðgandi og særandi skilaboð. Mörgum skilaboðanna hefur verið beint að Schuyler Helford, unnustu Groban.

Í úrskurði dómara kemur fram að konan hafi meðal annars sent Groban svohljóðandi skilaboð:

„Þú verður að virða heimili okkar. Hættu að stunda kynlíf með öðrum á heimilinu okkar þar sem við ætlum að eignast barn.“

Hún reyndi einnig að skilja gjafir eftir við útidyr heimilis Groban og sendi síðan eftirfarandi skilaboð:

„Setti smá farða á mig svona ef ég yrði staðin að verki. Ég var líka í buxum með gati í klofinu af sömu ástæðu.“