Óhætt er að segja að veturinn hafi ekki látið sjá sig í Danmörku. Það hefur varla frosið og snjór hefur ekki sést nema í örlitlu magni á stöku stað í nokkrar klukkustundir. Allt stefnir í að veturinn verði sá hlýjasti frá því að mælingar hófust 1874 en samkvæmt danskri venju hefst vorið þann 1. mars.

Kuldafatnaður, skóflur, snjóruðningstæki og annar vetrarbúnaður hefur að mestu fengið að vera óhreyfður í vetur. Gróður er farinn að taka við sér og sumsstaðar eru tré og runnar komin það langt að halda mætti að apríl sé genginn í garð. Vorblóm hafa víða stungið upp kollinum og langt er síðan páskaliljur fóru að gleðja augað.

Í Danmörku eru vetrarmánuðurnir þrír, það eru desember, janúar og febrúar. Eins og staðan er núna er meðalhiti þessa vetrar 5,1 gráða. Febrúar er þó ekki lokið og því gæti þetta breyst en danska veðurstofan, DMI, telur að þegar febrúar er allur verði meðalhiti vetrarins 5,0 gráður. Hlýjasti veturinn til þessa var 2006/2007 en þá var meðalhitinn 4,7 gráður.