Í yfirlýsingu sem tugir sagnfræðinga og sérfræðinga í málefnum fasisma og einræðisstjórna sendu frá sér á sunnudaginn vara þeir við að lýðræði um allan heim „eigi í vök að verjast eða sé að hrynja um allan heim“. Þeir hvetja venjulegt fólk til að grípa til aðgerða.
„Lýðræði er mjög brothætt og hugsanlega tímabundið, það þarf að gæta að því og verja,“
segir í yfirlýsingunni sem og: „Það er ekki of seint að snúa þróuninni við.“
Undir þetta skrifa 80 manns, þar á meðal prófessorar og aðrir fræðimenn við háskóla í Bandaríkjunum, Kanada og Evrópu. Þeir eru þó ekki sammála um hvort hægt sé að stimpla Donald Trump, Bandaríkjaforseta, fasista og segja að lýðræðið um allan heim verði áfram brothætt „óháð því hver sigrar í forsetakosningunum í Bandaríkjunum“.
„Hvort sem Donald J Trump er fasisti, popúlisti eða alræðisherra eða bara tækifærissinni þá hófust ógnirnar við lýðræðið ekki á forsetatíð hans og ná miklu lengra en til 3. nóvember 2020,“
segir í yfirlýsingunni.
