Leigubílstjórinn Mariander Singh sagði í viðtali á indversku sjónvarpsstöðinni, News 18, að hann hefði kyrkt og skorið kærustu sína, hina 27 ára gömlu Sarabjit Kaur, á háls á gamlárskvöld, vegna þess að hann hélt að hún væri að halda framhjá honum. Hann sagðist hafa komið á sjónvarpsstöðina til að gefa sig fram.

Singh sagði að fjölskylda fórnarlambsins hefði hafnað bónorði hans eftir að hafa rætt um það mánuðum saman. Viðræður um mögulegt hjónaband á milli fjölskyldu Singh og hinnar myrtu höfðu verið í gangi í sex mánuði en Singh segir að fjölskylda hennar hafði alltaf fundið einhverja ástæðu til að hafna bónorðinu.

Singh, sem sagt er að hafi verið dæmdur fyrir að myrða aðra konu árið 2010, var handtekinn eftir viðtalið á sjónvarpsstöðinni. Lögreglan var mynduð við komuna í sjónvarpssal og þegar Singh var leiddur út úr byggingunni og settur inn í bíl.

Sarabjit Kaur, sem var hjúkrunarfræðingur, og Singh tékkuðu sig inn á hótel í Chandigarh hinn 30. desember. Tveimur dögum síðar, eftir að Singh hafði tékkað sig út, fann starfsfólk hótelsins lík hennar á blóði drifnu rúminu.