Konan er sögð hafa tekið einn sopa af víninu en hellt restinni niður þar sem vínið bragðaðist illa. Hún hneig niður á heimili sínu og var flutt á sjúkrahús þar sem hún lést fimm dögum síðar. Krufning leiddi í ljós að konan var með banvænan skammt af MDMA í líkamanum.
Lögregla hefur farið með rannsókn málsins og segir í frétt Independent að ekkert bendi til þess að konan hafi neytt fíkniefna. Rannsókn á flöskunni hafi leitt í ljós að þar var að finna MDMA. Hvað nákvæmlega átti sér stað liggur ekki fyrir; hvort efnunum hafi verið blandað við vínið eða hvort vínið hafi verið sett í flöskuna eftir að MDMA-efnin voru fjarlægð.
Þó liggur fyrir að upprunalegur korktappi vínflöskunnar var ekki á flöskunni og hafði honum verið skipt út fyrir annan. Vínið sem um ræðir er 2016 Merlot Cabernet Sauvignon frá hollenska framleiðandanum Black & Bianco. Lögregla hefur ekki upplýsingar um það hvar konan fékk flöskuna en engar sambærilegar tilkynningar hafa komið á borð lögreglu.
Í frétt Independent kemur fram að eiturlyfjasmyglarar noti stundum vínflöskur til að smygla fíkniefnum. Þykir ekki útilokað að þessi tiltekna flaska hafi komið úr einhverri smyglsendingunni.