Eftir sex ára útlegð í Rússlandi segist uppljóstrarinn Edward Snowden vera tilbúinn að breyta um umhverfi. Þetta kom fram í viðtali Reuters við Snowden en um helgina sagði Nicole Belloubet, dómsmálaráðherra Frakklands, það koma til greina að veita Snowden hæli í landinu.

Bandarísk stjórnvöld lýstu eftir Snowden árið 2013 vegna leka á upplýsingum sem sýndu fram á umfangsmiklar persónunjósnir Öryggisstofnunar Bandaríkjanna.

Snowden segir í viðtalinu að það sé ekki fjandsamleg hegðun að veita uppljóstrurum vernd. „Að bjóða einhvern eins og mig velkominn er ekki árás á Bandaríkin,“ sagði Snowden og bætti við að hann myndi „elska það“ ef Emmanuel Macron Frakklandsforseti veitti honum hæli.

Belloubet sagðist persónulega styðja það að veita Snowden vernd. Hún ítrekaði þó að það væri hennar persónulega skoðun sem ekki þyrfti að endurspegla vilja annarra innan frönsku ríkisstjórnarinnar.

Bandarísk yfirvöld vilja handsama Snowden og hefur Donald Trump Bandaríkjaforseti látið hafa sér að Snowden sé njósnari sem eigi skilið að vera tekinn af lífi. Bernie Sanders, fyrrverandi forsetaframbjóðandi Demókrata, hefur þó sagst vera tilbúinn að binda enda á útlegð Snowdens ef hann verður kjörinn forseti.

Snowden var í viðtali við breska blaðið Guardian á dögunum í tilefni útgáfu æviminninga sinna, Permanent Record. Í viðtalinu sagðist hann lifa tiltölulega eðlilegu lífi í Moskvu ásamt eiginkonu sinni, Lindsay Mills.