Síðasta sumar kom kona, sem starfar sem sérfræðingur hjá uppboðshúsi í Senlis í Frakklandi, heim til eldri konu í bænum. Hún býr í húsi frá sjötta áratugnum. Hún hafði beðið uppboðshúsið að meta hvort einhver verðmæti væri að finna á heimilinu því hún ætlaði að fara að flytja en hún er á níræðisaldri.

„Ég hafði viku til að setja sérfræðimat mitt á innbúinu fram því síðan átti að tæma húsið og allt færi á ruslahaugana.“

Sagði sérfræðingurinn, Philoméne Wolf, í samtali við Le Parisien.

Um leið og hún kom inn í húsið sá hún málverk sem hékk í eldhúsinu, yfir eldavélinni að sögn The Guardian. Málverkið er ekki bara eitthvað málverk, heldur málverk eftir Ítalann Cimabue og er það talið vera frá 1280. Konan og fjölskylda hennar töldu að um gamalt rússneskt málverk væri að ræða en það sýnir þjáningar Krists.

En málverkið er ekki rússneskt og það er svo sannarlega einhvers virði því það er metið á sem nemur rúmlega 800 milljónum íslenskra króna. Það verður selt á uppboði í lok október.