Þegar Tim Cameron týndi veskinu sínu á leiðinni heim úr vinnu í London á mánudag átti hann ekki von á að endurheimta það. Ekki var að finna miklar persónulegar upplýsingar í veskinu – kannski sem betur fer.

Óhætt er að segja að Tim hafi brugðið í brún þegar honum var litið inn á heimabanka sinn síðdegis á mánudag. Þar sá hann nokkrar millifærslur inn á reikning sinn sem hver var upp á eitt pens. Með hverri millifærslu er hægt að senda 18 stafa skilaboð til móttakenda sem sá er millifærði nýtti sér.

Skilaboðin voru svona:

1. HI. I FOUND YOUR
2. WALLET IN THE ROAD
3. *SÍMANÚMER*
4. TEXT OR CALL!

Tim hringdi í númerið sem viðkomandi gaf upp og það reyndist vera hjá manni að nafni Simon sem hafði fundið veskið úti á götu. Simon gat ekki með nokkru móti fundið út hver ætti veskið nema með því að senda honum skilaboð í gegnum heimabankann.

Það er skemmst frá því að segja að Tim skellti sér á reiðhjólið og hjólaði heim til Simon og fékk veskið afhent aftur.