Yfirvöld í Beverly Hills í Kaliforníu samþykktu einróma á þriðjudaginn að banna sölu á sígarettum, vindlum, rafrettum og öðrum tóbaksvörum í borginni frá og með 2021. Einu staðirnir sem mega selja vörur sem þessar verða hótel og sérstakir vindlaklúbbar.

Eigendur bensínstöðva og söluturna eru ekki sáttir við bannið og óttast að tapa viðskiptum vegna þess og þar af leiðandi þurfi þeir að fækka starfsfólki.

Kaliforníuríki var eitt fyrsta ríki Bandaríkjanna til að banna reykingar á börum og veitingastöðum en það gerðist á síðasta áratug síðustu aldar. Beverly Hills er hluti af Los Angeles en er með eigin bæjarstjórn sem stýrir borgarhlutanum.