Árið 1969 keypti dönsk fjölskylda matarborð og 12 tilheyrandi stóla fyrir sem svarar til 230.000 íslenskra króna. Nýlega voru borðið og stólarnir seldir á uppboði hjá uppboðsfyrirtækinu Bruun Rasmussen og fengust sem svarar til 18,5 milljóna íslenskra króna fyrir munina.

Þetta kemur fram í fréttatilkynningu frá Bruun Rasmussen.

Borðið, svokallað Júdasarborð, og stólarnir, svokallaðir Egyptastólar, voru hannaðir af arkitektinum Finn Juhl og framleiddir í lok fimmta áratugarins. Hugmyndin að borðinu var sótt í grafhýsi Tutankhamon sem var opnað 1923 en þar voru meðal annars húsgögn og aðrar gersemar frá því um 1.300 fyrir krist.