Betur fór en á horfðist þegar snjóflóð lenti á hóteli í Appanzell Ausserrhoden-kantónunni í Sviss í gær. Gestir sem sátu að snæðingi á veitingastað hótelsins var mörgum verulega brugðið þegar snjóflóðið ruddist í gegnum glugga og útveggi.
Þrír eru taldir hafa slasast, þar af einn gestur veitingastaðarins sem þurfti að grafa upp úr flóðinu. Tuttugu og fimm bílar grófust undir flóðinu sem var nokkuð stórt eins og meðfylgjandi myndir af Twitter bera með sér.
Vinsælt skíðasvæði er í nágrenninu og hafa viðbragðsaðilar verið á svæðinu ef ske kynni að einhverjir fleiri hafi grafist undir. Ekki hefur þó verið tilkynnt um einstaklinga sem saknað er.
Mjög hefur snjóað á þessum slóðum að undanförnu og raunar víðar á meginlandi Evrópu. Veðurspár gera ekki ráð fyrir öðru en að áfram muni bæta í snjóinn þar til um miðja næstu viku.
