Sumir sofa í náttfötum, aðrir naktir og enn aðrir aðeins í nærbuxum. Sumir sofa í sokkum og aðrir ekki. Mörgum finnst kannski skrýtið að hugsa til þess að sofa í sokkum en það er ekki svo galið þegar upp er staðið. Það er kannski ekki mjög sjarmerandi að vera í sokkum uppi í rúmi en það getur verið notalegt.
Rannsókn vísindamanna í Basel í Sviss fyrir nokkrum árum sýndi að það getur verið gott að sofa í sokkum. Vísindamennirnir rannsökuðu tengslin á milli hita á höndum og fótum og hversu hratt fólk sofnar.
Ungt fólk var fengið til að taka þátt í rannsókninni og niðurstaðan var að meirihlutinn sofnaði hraðar þegar þeim var heitt á fótunum. Þegar æðarnar þenjast út dreifist hitinn til annarra líkamshluta sem gerir að verkum að fólk sofnar hraðar að sögn vísindamannanna.