„Við vorum að koma úr Costco, fórum inn svona hálf átta. Það var þægileg stemmning, engin röð inn í búðina og fullt af körfum, notalegt,“ segir listamaðurinn Sara Oskarsson og varaþingmaður Pírata. Hún birti myndskeið á Facebook-síðu sinni sem hefur vakið athygli. Þar greinir hún frá verslunarferð í Costco og miklum verðmun á vörum þar og í öðrum verslunum og tiltekur hún eina sérstaklega. Á samfélagsmiðlum má lesa um margar svipaðar sögur þar sem fólk er að bera saman verð í Costco og í öðrum verslunum. Myndskeiðið má sjá neðst í fréttinni en í því segir hún:
„Ég elska að fara í freyðibað. Þetta, Radox, er eiginlega hætt að fást, kannski dýrt að kaupa þetta inn og í staðinn er komin algjör viðbjóður sem er eiginlega ekki hægt að kalla freyðibað, því hvorki freyðir né kemur góð lykt og svo klæjar manni í húðina eftir baðið. En ég hef getað keypt Radox í apótekum og látið mig hafa að gera það.“
Sara fór í Costco og fann Radox þar. Tvær flöskur saman í pakkningu, líter hver.
„Hvað haldið þið að það hafi kostað. 549 krónur, tveir lítrar,“ segir Sara og bætir við:
„Á leiðinni heim ákvað ég að stökkva inn í apótek til að vera með verðið alveg á hreinu, til að geta borið það saman. Þar var hálfur líter af nákvæmlega sama stöffi á 1386 krónur. Það er búið að vera að hafa okkur að algjörum fíflum og það er bara komið nóg. Takk Costco.“