Talið er að allt að sex þúsund húsbruna á síðustu sex árum í Bretlandi megi rekja til gallaðra þurrkara. Breskir fjölmiðlar hafa fjallað ítarlega um þetta síðustu daga, en í umfjöllun Daily Mail er meðal annars fjallað um dauðaslys sem hafa orðið sem rekja má til gallaðra þurrkara.

Aðeins eru nokkrir dagar síðan eldur kom upp á heimili hinnar þrítugu Stacey Simpson. Eftir að hafa sett þurrkarann af stað fann hún einkennilega lykt koma frá þvottahúsinu. Þegar hún fór og gáði sá hún eldtungurnar standa úr þurrkaranum. Hún hljóp til tveggja dætra sinna og forðaði sér út úr húsinu áður en hún hringdi á slökkvilið.

Í umfjöllun breska blaðsins Mirror kemur fram að þrjú banaslys hafi orðið eftir að eldur kom upp í þurrkurum á síðustu árum. Þá hafa 300 slasast, sumir alvarlega. Spjótin beinast að þremur framleiðendum þurrkara; Hotpoint, Creda og Indesit sem framleiddir voru á árunum 2004 til 2015. Öll fyrirtækin eru í eigu móðurfyrirtækisins Whirlpool sem keypti þau árið 2014.

Í haust sá Mannvirkjastofnun Íslands ástæðu til að vera við þurrkurum frá þessum framleiðendum, það er Hotpoint, Creda og Indesit. „Hættan stafar af því að í einhverjum tilvikum getur ló komist í snertingu við hitald (hitaelement) og valdið bruna. Þurrkararnir voru framleiddir frá því í apríl 2004 þar til í september 2015 og voru seldir víða um Evrópu. Mannvirkjastofnun hafa ekki borist upplýsingar um hvort viðkomandi þurrkarar hafi verið seldir á Íslandi, en líkur eru þó á að svo sé,“ segir í frétt Mannvirkjastofnunar, en einföld leit á Google leiðir í ljós að þurrkarar frá Hotpoint og Creda hafi verið seldir hér á landi á síðustu árum.

Ef þú átt þurrkara frá Creda eða Indesit geturðu athugað hvort þinn þurrkari sé gallaður með því að smella hér. Þeir sem eiga þurrkara frá Hotpoint geta smellt hér.