Kvenfélag Hrunamannahrepps færði fjölskyldu Víglundar Þorsteinssonar, sem lést í hræðilegu slysi í Hvítá í lok maí, einstaka gjöf í gær; draumavél Víglundar og föður hans. 

Söfnun var sett af stað fyrir fjölskyldu Víglundar sem kvenfélagið sá um og vill félagið þakka öllum sem lagt hafa söfnuninni lið fyrir stuðninginn.

„Það er ómetanlegt að finna hve margir eru tilbúnir að hjálpa til við að létta fjárhagsáhyggjum af fjölskyldunni á þessum erfiðu tímum.

Söfnunin gengur vonum framar. Svo vel reyndar að  formaður félagsins, sóknarpresturinn okkar ásamt nánum frænda hafa undanfarið unnið að því að finna og kaupa það sem kæmi sér best fyrir fjölskylduna á þessum tímapunkti. Jarðvinna og heyskapur í sveitinni bíða ekki, svo niðurstaðan var dráttarvél, þar sem þeirra aðalvél eyðilagðist í slysinu.“

Í færslu kvenfélagsins á Facebook segir að söfnuninni sé ekki lokið, en hluti söfnunarfjárins hafi farið í kaup á dráttarvélinni. Sjá reikningsupplýsingar neðst í greininni.

„Við vorum svo heppin að finna draumavél þeirra feðga Víglundar og Steina, John Deer 6120 M, á viðráðanlegu verði. Frændinn keyrði hana í morgun úr Reykjavík og var hún afhent fjölskyldunni í Haukholtum eftir hádegið í dag, 11. júní.

Það var augljóst að þungu fargi var létt af þeim hjónum, að þurfa ekki, í allri sorginni, að nota dýrmætan tíma í að finna og fjármagna dráttarvél sem er þeim svo nauðsynleg.

Eins og sjá má á myndinni þá var afturrúðan sérstaklega merkt.“