Albert fylgir mataræðinu ásamt stórum hóp af fólki í næringarráðgjöf hjá Elísabetu Reynisdóttur.
„Þetta er til að hafa stjórn á blóðsykri. Hugmyndin er sú að blóðsykurinn verði jafnari, bólgur minnki og maður fái aukna orku, og þyngdartap fyrir þau sem þurfa,“ segir Albert.
„Það er búið að ganga vel. Það var svolítið erfitt að ná taktinum, það er gert ráð fyrir að maður borði morgunmat, hádegismat og kvöldmat, og ég er ekki vanur að borða morgunmat. Þannig að ég þurfti að hugsa aðeins upp á nýtt, en það kom alveg mjög fljótt. Þetta er góður og fjölbreyttur matur,“ segir Albert.
Hann segir að mataræðið samanstandi af alls konar kjöti, grænmeti en mjög lítið er af kolvetnum. Mataræðið myndi flokkast sem lágkolvetnamataræði en ekki ketó þar sem hann borðar stundum ávexti eins og mangó, perur og epli. Albert segir að sér líði ótrúlega vel eftir viku á þessu fæði, þrátt fyrir að hafa dottið í sukkið í kaffiboði á sunnudeginum. Hann ætlar að halda ótrauður áfram. „Ég féll á sunnudaginn. Það var kökuboð, það var bara þannig,“ segir hann og hlær.
Albert heldur úti vinsælu síðunni AlbertEldar.com og samnefndri Facebook-síðu. Hann ver miklum tíma í eldhúsinu og segir að þetta mataræði sé viss áskorun fyrir hann.
„Ég hef mjög gaman af því að baka og stússast í hveiti og sykri og því sem telst ekki endilega það hollasta. Þannig að fyrir mig er þetta ákveðin áskorun, sem gekk alveg þar til á sunnudaginn. Þá datt ég gjörsamlega í það,“ segir Albert.
„Ég finn mikinn mun á mér við að sleppa sykrinum. Orkan mín er miklu jafnari, ég sef vel og verð aldrei svona banhungraður. Eftir að ég náði þessum takti þá hefur mér liðið ofboðslega vel,“ segir hann.
„Það sem hefur kannski komið á óvart er hvað þetta er fjölbreyttur matur og rosa bragðgóður. Mér líður vel og þetta er í raun miklu auðveldara en ég hélt. Maður miklar það svo oft fyrir sér að fylgja einhverju prógrammi. Stundum er maður þreyttur á að elda og finnst maður alltaf vera að gera það sama og er hálf andlaus, og þá er svo gott að fá svona prógramm til að fylgja.“
Morgunmatur:
Chia-grautur með lífrænni jógúrt og kanil og stundum ávöxtum. Ég er mikill kaffikall og finnst kaffi með rjóma mjög gott. Ég fæ mér tvo svoleiðis bolla fyrir hádegi.
Hádegismatur:
Kjúklingur í mangó-sósu.
Kvöldmatur:
Þetta er svo fjölbreytt. Í kvöld er grænmetissúpa með kókosmjólk og seinna í vikunni verða kjötbollur með kúrbít og þorskur með beikoni.