Þvottaefni selt á staðnum – Geysistórt barnaleiksvæði og ljúffengur matur
Laundromat er afar vinsælt bistróstaður í Austurstræti sem bæði erlendir ferðamenn og Íslendingar sækja í stríðum straumum. Eitt sem gefur Laundromat mikla sérstöðu er þvottahús á neðri hæðinni sem fólk notar mikið og fær sér kaffibolla eða eitthvað að borða á meðan það bíður þess að þvotti ljúki. Sólveig Gísladóttir, vaktstjóri Laundromat, segir að fólk geti komið hvenær sem er þegar staðurinn er opinn til að þvo þvott.
„Við erum með fullkomna þvottaaðstöðu á neðri hæðinni þar sem viðskiptavinir hafa aðgang að fjórum þvottavélum og fjórum þurrkurum. Fólk kemur á barinn og kaupir þvottapeninga til þess að fá aðgengi í vélarnar,“ segir Sólveig. „Viðskiptavinir geta líka keypt þvottaefni ef það er ekki með slíkt sjálft. Hugsunin er sú að fólk bjargi sér sjálft: það er í raun bara sjálfsafgreiðsla en þjónar á vakt eru að sjálfsögðu alltaf reiðubúnir að veita aðstoð ef þess þarf,“ segir hún. „Það er nánast aldrei bið hjá okkur,“ segir Sólveig í framhaldinu. Sólveig segir viðskiptavini geta þvegið þvott hvenær sem er á opnunartíma svo framarlega þvottaprógrammið klárist fyrir lokun staðarins.
Laundromat er, eins og áður sagði, bistró sem býður upp á létta rétti sem gjarnan eru pantaðir í hádeginu en einnig er í boði íburðarmeiri matur eins og lax og steikarsamlokur sem vinsælla er að panta sér á kvöldin. „Staðurinn er þó einna þekktastur fyrir rómaðan morgunverð sem er í boði frá kl. 08.00 á morgnana til 11.30 á virkum dögum og brönsinn sem er borinn fram frá kl. 09.00 til 15.00 um helgar. „Það er því tilvalið fyrir fólk að fá sér eitthvað að borða og nýta þar með tímann betur á meðan þvottavélarnar klára prógrammið,“ segir Sólveig. „Annars er gott jafnvægi milli erlendra ferðamanna og Íslendinga í gestaflóru staðarins,“ segir Sólveig. Laundromat er ekki síst þekkt fyrir geysistórt barnaleiksvæði á neðri hæðinni svo staðurinn er mjög vinsæll hjá barnafjölskyldum. „Foreldrar stærri barna geta því setið ótruflaðir á efri hæðinni á meðan börnin una sér á leiksvæðinu. Það eru líka borð niðri svo foreldrar geta setið og borðað og haft auga með krökkunum á sama tíma,“ segir Sólveig. Staðurinn er opnaður kl. 08.00 á morgnana og er opinn til kl. 23.00 á kvöldin nema á fimmtudögum og föstudögum, en þá er opið til miðnættis. Á laugardögum er opið frá kl. 09.00 til miðnættis og á sunnudögum til kl. 23.00.
