Spænska flugfélagið Vueling hefur verið gert að greiða níu íslenskum farþegum bætur vegna niðurfellds flugs frá Barcelona til Keflavíkur. Fólkinu var ekki tilkynnt um ástæður niðurfellingarinnar.
Um er að ræða tvo hliðstæða dóma sem féllu í Héraðsdómi Reykjaness í gær, 8. apríl. Í öðrum málinu voru fjórir stefnendur en hinu fimm.
Fólkið átti sæti í flugi frá Barcelona til Keflavíkur þann 4. apríl árið 2022. Fluginu var skyndilega aflýst og farþegum ekki sagt af hverju.
Fólkið krafðist þess að flugfélagið greiddi þeim hverju um sig 400 evrur í skaðabætur, það er um 58 þúsund krónur með vísan til Evrópureglna. Hið spænska lággjaldaflugfélag sagðist hins vegar ekki hafa fengið nein bréf með þessum kröfum.
Einnig að fluginu hafi verið aflýst vegna óviðráðanlegra verðuraðstæðna á Keflavíkurflugvelli byggt á veðurspá. Búast hafi mátt við litlu skyggni og snjókomu.
Þá hafi flugið verið endurgreitt í gegnum ferðaskrifstofu daginn eftir aflýsinguna. Þar með hafi flugfélagið lágmarkað neikvæðar afleiðingar vegna hinna óviðráðanlegu aðstæðna.
Dómari taldi að Vueling hafi ruglast á skýjahæð og skyggni í veðurspánni. Skyggnið hafi verið mun meira en lágmarksskilyrði eru á Keflavíkurflugvelli. Ekkert var að veðrinu í Keflavík þennan dag að mati sérfræðinga flugrekstrardeildar Samgöngustofu. Hefði því ekki verið um óviðráðanlegt atvik að ræða.
Var Vueling dæmt til að greiða hverjum farþega 56.720 krónur með vöxtum auk 144.758 krónur í málskostnað.
