Oddný Harðardóttir, fyrrum ráðherra, spáir því að stjórnarandstöðuflokkarnir muni horfast í augu við mikið fylgistap í næstu Gallupkönnun. Nú standi yfir málþóf andstöðunnar gegn hækkun veiðigjalda þó svo að meirihluti kjósenda sé fylgjandi frumvarpinu.
Oddný birti færslu í gær þar sem hún útskýrir um hvað málið snýst.
„Málþóf um veiðigjöld er enn í fullum gangi á Alþingi. Um hvað snýst málið? Jú það er um að hækka veiðigjald á kíló af þorski úr 29 krónum í 46 krónur og veiðigjald á uppsjávarfiski miðist við 80% verð á norskum fiskmörkuðum. Fara úr verðviðmiði í reiknireglunni um veiðigjald sem fæst þegar útgerðir versla við sjálfa sig í verð frá mörkuðum. Það er nú öll breytingin.“
Oddný rekur að meirihluti kjósenda vilji sjá frumvarpið verða að lögum enda sé hér um gegnsærra og réttlátara fyrirkomulag að ræða en það sem nú er í gildi. Með færslu sinni birtir hún súlurit til að setja breytingarnar í samhengi.
„Útgerðarmenn leigja kílóið af þorski sín á milli á 500 krónur í þessum mánuði. Fiskframleiðendur og útflytjendur (SFÚ) gerðu tilboð í desember í fyrra og vildu þá borga 150 krónur í veiðigjald fyrir kílóið af þorski. Landssamband smábátaeigenda hafði þá þegar gert tilboð upp á 100 krónur í kílóið. Frumvarpið leggur til 46 krónur á meðan veiðigjaldið er núna 29 krónur.
Ég spái því að umræðan á Alþingi gufi upp þegar stjórnarandstöðuflokkarnir horfast í augu við mikið fylgistap í næstu Gallupkönnun.“
Fyrrum þingmaður Pírata, Björn Leví Gunnarsson, skrifar í athugasemd við færsluna að út frá þessu mætti ætla að veiðigjaldið mætti jafnvel vera enn hærra.
