Rannsókn lögreglu á harmleiknum á Edition-hótelinu er í fullum gangi en eins og greint hefur verið frá er frönsk kona í haldi grunuð um að hafa ráðið eiginmanni sínum og dóttur bana á hótelinu um liðna helgi.

Ævar Pálmi Pálmason, aðstoðaryfirlögregluþjónn miðlægrar rannsóknardeildar lögreglu, sagði við franska fjölmiðla í gær að lögregla hér á landi hefði verið í samskiptum við frönsku lögregluna vegna málsins.

„Enn sem komið er hafa þeir ekki sýnt því áhuga að koma til Íslands en mögulega munu þeir ekki komast hjá því,” er haft eftir honum í franska miðlinum Voici.

Greint hefur verið frá því að fjölskyldan hefði bókað gistingu í sex nætur og harmleikurinn átt sér stað rétt áður en sá tími var liðinn. Þá hefur verið greint frá því að fólkið hafi verið búsett í Dublin á Írlandi og er haft eftir Ævari Pálma að það flæki rannsóknina að málið teygi sig til þriggja landa.

Konan hefur legið á sjúkrahúsi með stunguáverka síðan á laugardag.

Í frétt Voici kemur einnig fram að Ævar Pálmi hafi ekkert viljað segja til um það hvernig áverkarnir sem voru á konunni komu til. „Það er eitt af því sem við erum að rannsaka og við erum á fullu að því. Rannsóknin er skammt á veg komin en gengur samt vel.”