Ekki er öll vitleysan eins. Þessu komst maður í Texas að nýlegar þegar hann uppgötvaði sér til skelfingar að hann var ekki lengur einhleypur heldur giftur. Hann kannaðist nefnilega ekkert við að hafa gift sig og nú situr „eiginkona“ hans í gæsluvarðhaldi ákærð fyrir umsáturseinelti.
Kristin Marie Spearman er 36 ára gömul og þolandi hennar, sem nýtur nafnleyndar í umfjöllun fjölmiðla, er 42 ára. Lögreglustjórinn í Beverly Hills, Kory Martin, lýsir því svo að embætti hans hafi borist undarlegt símtal á föstudaginn. Á hinni línunni var 42 ára þolandinn í málinu sem greindi frá því að hafa fengið sendingu frá fyrrverandi kærustu sem vakti áhyggjur hans. Í sendingunni var nefnilega hjúskaparvottorð sem sýndi að hann væri giftur.
Þolandinn sagðist hafa átt í ástarsambandi við Spearman og þau ætluðu að gifta sig. Þau fengu því leyfi til að ganga í hjúskap í júní, en slitu trúlofun sinni áður en athöfnin fór fram. Því hafi það komið manninum að óvörum að hann sé í dag giftur.
Martin lögreglustjóri segir að rannsókn hafi leitt í ljós að Spearman hafi sannfært prest um að framkvæma hjónavígslu þó að brúðguminn væri ekki á staðnum. Síðan fór Spearman með pappírana til sýslumanns til að fá hjónabandið formlega skráð og fékk vottorð þess efnis.
Þetta athæfi er ólöglegt og Spearman var því handtekin og úrskurðuð í gæsluvarðhald.
