Hávær orðrómur hefur verið um að Donald Trump Bandaríkjaforseti náði Derek Chauvin, lögreglumanninn sem drap George Floyd. Fylkisstjórinn segist gera ráðstafanir verði Chauvin náðaður.
Tímaritið People greinir frá þessu.
Chauvin var dæmdur í samanlagt 43,5 árs fangelsi fyrir að verða Floyd að bana þann 25. maí árið 2020 með því að þrengja að öndunarvegi hans með hnénu þar sem Floyd lá í götunni. Um helmingur dómsins var fyrir brot á alríkislögum. Þrír aðrir lögreglumenn fengu dóma vegna málsins en mun styttri.
Málið hratt af stað bylgju mótmæla undir fána hreyfingarinnar Black Lives Matter og olli mikilli umræðu um lögregluofbeldi gagnvart svörtu fólki, bæði í Bandaríkjunum og víðar.
Hávær orðrómur hefur verið uppi um að Trump náði Chauvin en hann hefur leynt og ljóst barist gegn Black Lives Matter hreyfingunni. Það að Trump hafi barist fyrir því að fá öfgamanninn Andrew Tate lausan úr fangelsi í Rúmeníu hefur styrkt þennan orðróm, en Tate er grunaður um nauðgun og mansal þar í landi og víðar.
Gengið hefur verið á Trump varðandi þetta efni en hann hefur neitað því að ætla að náða Chauvin. Meðal annars í mars síðastliðnum þegar hann sagði: „Nei, ég hef ekki heyrt um það.“ Engu að síður heldur orðrómurinn áfram að vera hávær, enda hefur fólk lært að taka öllu sem Trump segir með miklum fyrirvara.
Verði Chauvin náðaður má búast við mikilli ólgu í samfélaginu. Ekki síst í Minnesota fylki þar sem morðið var framið. Þar er Tim Walz, fyrrverandi varaforsetaframbjóðandi, fylkisstjóri og hann var spurður út í þetta.
„Við höfum ekki fengið neinar vísbendingar um hvort hann hyggist gera þetta eða ekki en það er vel við hæfi að við séum undirbúin undir þennan möguleika,“ sagði Walz í viðtali við Tribune. „Þetta er eitthvað sem þessi forseti myndi gera.“
Tekur Walz það fram að ef Trump náðar Chauvin þýðir það ekki að hann gangi samstundis laus. Trump geti einungis náðað þann hluta dómsins sem telst til alríkisins. Það er 21 ár af fangelsisdómnum. Chauvin muni áfram þurfa að afplána fylkishlutann, sem er 22,5 ár.
Toddrick Barnette, almannaöryggisstjóri Minneapolis borgar, sagði að viðbragð væri til staðar ef Chauvin yrði náðaður. Þar sem búast mætti við töluverðri ólgu.
„Höfum það á hreinu að við höfum ekki fengið neinar upplýsingar um náðun eða fyrirhugaðar truflanir hérna í Minneapolis,“ sagði Barnette við Tribune. „Frá árinu 2020 höfum við gjörbylt okkar neyðarviðbragði og erum undirbúin undir hvað sem er.“
