Ólöf Björnsdóttir, fyrrverandi tengdamóðir barnsföður Ásthildar Lóu Þórsdóttur, fyrrverandi ráðherra, segir að henni sé verulega misboðið yfir framgöngu Kristrúnar Frostadóttur forsætisráðherra.

Eins og kunnugt er skrifaði hún grein um málið á Vísi í gær sem vakti þó nokkra athygli og í dag er hún í viðtali við Morgunblaðið þar sem hún fer nánar yfir sína hlið á málinu.

Sjá einnig: Tengdamamman stígur aftur fram – „Þetta viðurkenndi Ásthildur Lóa þegar hún hringdi í mig“

„Mér er mjög mis­boðið, að hún skuli standa í pontu Alþing­is og eig­in­lega segja mig ljúga,“ seg­ir hún í samtali við blaðið. Vísar Ólöf til þess þegar Kristrún rengdi orð hennar um að hún hefði óskað eftir fullum trúnaði þegar hún bað um fund með for­sæt­is­ráðherra vegna Ásthild­ar Lóu.

„Ég vil helst að hún standi í pontu Alþing­is og biðji mig af­sök­un­ar þar,“ seg­ir Ólöf við Morgunblaðið.

Í grein sinni á Vísi í gær sagði Ólöf það liggja fyrir að hún hringdi í forsætisráðuneytið og það hafi hún gert í þeim tilgangi að óska eftir upplýsingum um hvort farið væri með erindi sem þangað berast í gegnum tölvupóst sem trúnaðarmál.

„Svarið var já. Ég vildi að það væri al­gjör­lega ör­uggt og spurði aft­ur, því ég vildi ekki að þess­ar upp­lýs­ing­ar færu um borg og bý. Aft­ur staðfesti starfsmaður­inn það. Sím­talið var fjög­urra mín­útna langt – hvað annað átti ég að ræða í þess­ar fjór­ar mín­út­ur við starfs­mann í símsvörun?“ sagði Ólöf.