Síðastliðinn föstudag voru höfuðstöðvar sænsku öryggislögreglunnar Säpo, í Solna norður af Stokkhólmi, rýmdar eftir að grunur lék á um að gasleki hefði komið upp í byggingunni. Nokkrir starfsmenn veiktust. Nú hefur verið staðfest að um var að ræða baneitraða gastegund.

Um var að ræða Fosgen, öðru nafni kóbalt klóríð, sem er eitrað og hefur verið notað sem efnavopn í hernaði.

Það er Aftonbladet sem greinir frá.

Mikið tilstand var þegar byggingin var rýmd síðastliðinn föstudag. Stórt svæði var afgirt og fólk á svæðinu var beðið um að halda sig innandyra. Alls voru 8 manns fluttir á sjúkrahús.

Skömmu eftir að byggingin var rýmd bárust fréttir að um fosgen hefði verið að ræða en lögreglan vísaði því á bug. Skjöl yfirvalda í Stokkhólmsumdæmi hafa hins vegar sýnt fram á að sannarlega var um fosgen að ræða.

Samkvæmt skjölunum varð það strax ljóst á föstudag þegar embættismenn í umdæminu funduðu með viðbragðsaðilum að um væri að ræða fosgen, mælingar hefðu staðfest það. Magnið sem mældist var 0,6 milljónustuhlutar (ppm) en til að bana manneskju á einni mínútu þarf 500 milljónustuhluta. Það voru starfsmenn eignaumsjónar hússins sem framkvæmdu mælinguna en mælingarbúnaður var á þaki byggingarinnar.

Í skjölunum segir að fosgen geti myndast við logsuðu.

Fosgen er lyktarlaust og getur í nægilega miklu magni meðal annars valdið öndunarerfiðleikum, ógleði, og brjóstverkjum.

Þessi eiturgasleki um höfuðstöðvar Säpo er til rannsóknar hjá lögreglunni.