Þann 28. febrúar næstkomandi verður þingfest fyrir Héraðsdómi Reykjavíkur mál sem höfðað hefur verið gegn Reykvíkingi á fertugsaldri. Manninum er gefið að sök að hafa greitt fyrir vörur í Nettó að Fiskislóð 3 með fölsuðum tíu þúsund króna seðli.
Atvikið átti sér stað föstudaginn 3. júní árið 2022. Segir í ákæru að maðurinn hafi vitað eða haft grun um að tíu þúsund kallinn væri falsaður.
Þess er krafist að maðurinn verði dæmdur til refsingar og greiðslu alls sakarkostnaðar.
Við peningafalsi liggur allt að tveggja ára fangelsi en einnig segir um þetta í hegningarlögum (151. og 152. grein almennra hegningarlaga) að beita megi sektum eða láta refsingu falla niður ef málsbætur eru.