Ingólfur Sverrisson, fyrrverandi forstöðumaður Málm- og véltæknisviðs Samtaka iðnaðarins, er stoltur af sínu fólki eftir afrek næturinnar við að koma saman heitavagnslögn. Búist er við heitu vatni til Suðurnesja í dag eða kvöld.

„Mitt gamla stálhjarta sló mörg aukaslög í gleði og stolti þegar málmsuðu- og tæknimennirnir luku því gríðarlega vandasama verki í nótt að smíða og tengja hjáveitulögn yfir nýja hraunið og koma heita vatninu aftur til íbúanna,“ segir Ingólfur í grein á Vísi í dag.

Ingólfur segir að það þurfi mikla vandvirkni og fádæma elju að sjóða saman lögn úr gríðarlega þungum rörum úr stáli. Beita þurfi ýtrustu nákvæmni og hæstu faglegu gæðum. Ofan á allt saman var þetta gert úti á víðavangi í frosti og nepju.

„Snillingarnir sem þetta gerðu þurftu að hita snertifleti þessara miklu röra að bræðslumarki og fylla síðan hvern millimetra þar á milli með málmblöndu úr rafsuðupinnum þannig að allt væri pottþétt, haldgóð og traust heild,“ segir Ingólfur. „Gríðarlegt nákvæmnisverk sem eingöngu er á færi bestu fagmanna.“

Þeir hafi lokið þessu verki á skemmri tíma en nokkur hafi þorað að vona og lagt allt í sölurnar til þess að tryggja fólkinu á Suðurnesjunum birtu og yl.

„Við tökum ofan fyrir þessum mönnum og þökkum þeim fyrir að nýta faglega hæfileika sína, elju og útsjónarsemi til hagsbóta fyrir aðra. Þeir eru þjóðarsómi,“ segir Ingólfur að lokum.