„Ég er að hlusta á Sigmund Davíð tala um svakalega erfiða fjárhagsstöðu ríkissjóðs þegar hann tók við 2013 og að hann hafi unnið mikið afrek við að koma á hallalausum fjárlögum 2014 og ná niður verðbólgu. Staðreyndin er sú að halli ríkissjóðs var samkvæmt fjárlögum 2013 um 3,6 milljarðar króna. Var 216 milljarðar árið 2009,“ segir Oddný í færslu á Facebook-síðu sinni en hún var fjármálaráðherra árin 2011 til 2012.
Í viðtalinu sagði Sigmundur, sem tók við sem forsætisráðherra árið 2013, að ríkisstjórn hans hefði tekið við í mjög erfiðu ástandi; hallarekstur ríkisins verið miklu meiri en gert hafði verið ráð fyrir og ríkisstjórn hans einsett sér að skila hallalausum fjárlögum.
Á sama tíma hefði stjórnin kynnt skattalækkanir, auknar vaxtabætur og barnabætur og auknar greiðslur til eldri borgara og öryrkja.
„Hver var afraksturinn? Vextir féllu eins og steinn og þegar árið var gert upp var meira en 70 milljarða afgangur.“
Í færslu sinni bendir Oddný á að verðbólgan hafi verið 18,6% í janúar 2009 en hafi verið komin niður í 3,3% þegar ríkisstjórn Sigmundar Davíðs tók við.
„Mér finnst hins vegar blasa við að árin 2013-2016 hafi verið ár glataðra tækifæra þegar enn var slaki í hagkerfinu en möguleiki á uppbyggingu innviða ekki nýttur. Og hann sagðist hafa hækkað barnabætur. Það er rangt. Hann hélt sömu krónutölu og í fjárlögum 2013. Semsagt raunlækkun. Gat bara ekki orða bundist,“ segir hún í færslu sinni.
Gunnar Smári Egilsson, stofnandi Sósíalistaflokksins, gagnrýndi Sigmund einnig í færslu á Facebook.
„Sigmundur Davíð var að stæra sig af að hafa lækkað skatta og náð hallalausum fjárlögum á sama tíma. Þetta er rangt. Hann lækkaði skatta á hin tekjuhæstu en hækkaði umtalsvert skatta á fólk með miðlungstekjur og gríðarlega á þau sem eru á lágum tekjum. Og þetta er aðeins brot af því sem hann sagði en á sér enga stoð. Tengsl Sigmundar við raunveruleikann verða æ veikari,“ sagði hann.
