Kona frá Vopnafirði liggur þungt haldin á sjúkrahúsi á Akureyri eftir líkamsárás á heimili sínu snemma á miðvikudagskvöld. Meintur gerandi er fyrrverandi sambýlismaður konunnar en fólkið býr hvort á sínum sveitabæ skammt fyrir utan þorpið við Vopnafjörð.

DV greindi frá því í gær að maðurinn hafi verið handtekinn eftir árásina og yfirheyrður af lögreglunni á Egilsstöðum. Hann hafi þó verið látinn laus að lokinni yfirheyrslu og lögregla ekki lagt fram kröfu um gæsluvarðhald, þar sem hún taldi málið liggja ljóst fyrir.

Lögreglan á Austurlandi hefur nú skipt um skoðun og segir í tilkynningu að krafa um gæsluvarðhald verði tekin fyrir síðar í dag og eins hafi maðurinn verið úrskurðaður í nálgunarbann gegn konunni.

Segir í tilkynningu lögreglu:

„Einstaklingur var handtekinn á Vopnafirði síðastliðinn miðvikudag grunaður um alvarlega líkamsárás gagnvart fyrrum sambýliskonu. Rannsókn málsins hefur staðið nánast óslitið síðan. Skýrslur hafa verið teknar af sakborningi, vitnum og brotaþola. Gagna úr eftirlitsmyndavélum aflað og húsleit gerð á heimili sakbornings þar sem grunur lék á að skotvopn væru geymd. Engin slík fundust.

Ákvörðun var tekin um nálgunarbann og hún birt sakborningi.

Eftir því sem rannsókn málsins vatt fram var ákvörðun tekin um að krefjast gæsluvarðhalds. Krafan verður tekin fyrir síðar í dag.“

Árásin á miðvikudagskvöld er nýjasti kaflinn í langri ofbeldissögu sem sögð er hafa eitrað líf tveggja barna fólksins og valdið þeim miklum skaða. Maðurinn er sagður hafa reynt að brjóta kynferðislega gegn konunni á sunnudag. Eftir þá árás var konunni synjað um nálgunarbann þar sem atvikið þótti ekki nægilega alvarlegt.

Á mánudag er maðurinn sagður hafa útvegað sér skotvopn sem hann miðaði að húsi konunnar. Síðan átti áðurnefnd árás sér stað á miðvikudag.

Á sunnudagskvöld er maðurinn sagður hafa reynt að nauðga konunni á heimili hennar. Þrátt fyrir þá árás synjaði sýslumaðurinn á Egilsstöðum konunni um nálgunarbann. Var því borið við að atvikið væri ekki nógu alvarlegt til að réttlæta nálgunarbann.

Konan er á fertugsaldri en maðurinn er á sextugsaldri. Fyrir um 15 árum var hann sakfelldur fyrir kynferðisbrot gegn unglingsstúlkum sem dvöldust á vistheimili þar sem hann starfaði. Á undanförnum misserum hefur hann kærður til lögreglu fyrir líkamsárásir á Vopnafirði.

Meira um málið: Konan tjáir sig og fyrrverandi vinur mannsins lýsir skelfilegri árás – „Ég á kúbein“