Dmitri Lissitzky var meðal þeirra rússnesku hermanna sem höfðu hlotið flest heiðursmerki en hann tók þátt í öllum stríðum Rússa frá 1993.
Rússneskir fjölmiðlar skýrðu frá því í gær að Lissitzky, sem var yfirlautinant og foringi úrvalssveitar fallhlífarhermanna, væri látinn. Hann hafði meðal annars hlotið æðsta heiðursmerki Rússlands, Hetja Rússlands, fyrir stríðsþátttöku sína síðustu áratugi.
Úkraínskir fjölmiðlar fjölluðu um andlát hans í gær og glöddust mjög og sögðu að honum hefði verið „eytt“.
Lissistzky var í fararbroddi rússneskra hermanna sem niðurlægðu úkraínska herinn 2014 við bæinn Ilovajsk. Þá handsömuðu Rússar fjölda úkraínskra hermanna og felldu 366. Þessi atburður er þekktur sem „slátrunin við Ilovajsk“. BBC sagði 2019 að þessi orusta hafi verið sú mannskæðasta í síðari tíma sögu Úkraínumanna. Lissitzky fékk einmitt æðsta heiðursmerki Rússlands eftir þessa orustu.
Juri Butusov, úkraínskur blaðamaður, sagði i gær að úkraínskir hermenn hefðu drepið Lissitzky.
Á sama tíma og Úkraínumenn fagna dauða hans og segja að úkraínskir hermenn hafi drepið hann þá segja rússneskir fjölmiðlar aðra sögu og segja að hann hafi svipt sig lífi á heimili síju í Stavropol.