Umboðsmaður alþingis ályktaði í vor að innviðaráðuneytið hefði verið heimilt að vísa frá stjórnsýslukærum Þrastar Jónssonar, oddvita Miðflokksins í Múlaþingi. Meirihluti sveitarstjórnar kaus hann vanhæfan til að fjalla um leiðaval Fjarðaheiðagangna.
Austurfrétt greindi fyrst frá málinu en ályktunin var ekki birt á vef Umboðsmanns fyrr en nýlega.
Vanhæfismálið hefur vakið mjög harðar deilur í sveitarstjórn og miðvikudaginn 13. september sauð upp úr þegar Þröstur neitaði að yfirgefa sveitarstjórnarfund. Aðkoma lögreglu og handalögmál komu til tals í fundarhléi þann dag á Egilsstöðum en Þröstur vitnaði í ritninguna og sat sem fastast.
Meirihluti sveitarstjórnarmanna kusu Þröst vanhæfan í málinu 5. júlí 2022 vegna þess að bróðir hans á land sem göngin myndu fara um. Þröstur og Hannes Karl Hilmarsson, annar á lista Miðflokksins í Múlaþingi, hafa barist fyrir annarri leið en meirihlutinn vildi fara og báðir hafa þeir verið gerðir vanhæfir til að fjalla um málið.
Málinu var skotið til Innviðaráðuneytisins og greinir fólk á um niðurstöðu þess. Meirihlutinn telur að álit ráðuneytisins, mjög langt plagg frá 16. janúar, sýni að framkvæmd vanhæfisins hafi verið rétt en Þröstur telur að ráðuneytið hafi ekki tekið afstöðu.
Stjórnsýslukæra Þrastar til Umboðsmanns laut að því og fór hann fram á að ráðuneytið gerði frumkvæðisrannsókn á stjórnsýslu Múlaþings.
Umboðsmaður alþingis gerir ekki athugasemdir við meðferð ráðuneytisins á málinu. Ákvörðun sveitarstjórnarinnar hafi ekki verið stjórnvaldsákvörðun heldur málsmeðferðarákvörðun og því ekki kæranleg til ráðuneytis.
Þröstur kvartaði einnig undan öðrum atriðum í stjórnsýslu sveitarstjórnar. Umboðsmaður tekur ekki afstöðu til þeirra þar sem atriðin lúta ekki að endanlegum ákvörðunum í stjórnsýslunni.
