Þetta segir í inngangi greinar eftir hernaðarsérfræðinginn Sean Bell á vef Sky News. Hann bendir á að Hamas hafi ekki hernaðarlegan mátt til að sigra Ísrael og því sé þetta síðasta ofbeldisverk samtakanna dæmt til að enda með að enginn standi uppi sem sigurvegari, það eina sem muni bætast við sé fjöldi fórnarlamba.
Hann spyr síðan af hverju Hamas hafi ráðist á Ísrael og hverju samtökin vilji ná með þessu?
Í svari sínu bendir hann á að Hamas ráði yfir miklu af vopnum en sé ekki nærri hernaðarmætti Ísraela en það hafi ekki hindrað Hamas í að gera árásina sem hafi verið vel heppnuð.
En þrátt fyrir að árásin hafi verið vel heppnuð, þá hafi Hamas vitað að Ísraelsmenn myndu svara fyrir sig og að svarið kæmi fljótt og yrði öflugt. Samtökin hljóti einnig að hafa vitað að nágrannaríkin myndu ekki blanda sér í málið og jafnvel þótt Hizbollah blandi sér í málið, þá muni það ekki skipta sköpum.
Hann bendir á að það sé einn aðili sem hagnist á þessum átökum og það sé Íran. Sum nágrannaríkja Ísraels hafi bætt samskiptin við landið á síðustu árum, nú síðast hafi Sádí-Arabía verið að koma sambandi ríkjanna tveggja í gott horf.
Allt þetta hafi farið illa í írönsku klerkastjórnina sem telji sig hliðarsetta og einangraða. Auk þess séu samskipti landsins við Vesturlönd ekki upp á marga fiska.
Það sé harmleikur í sjálfu sér að Hamas sé nær örugglega notað sem peð í tafli sem hafi dauða, þjáningar og hatur í för með sér, bæði fyrir Palestínumenn og Ísraelsmenn. Árás Hamas hafi kveikt enn eina ofbeldisölduna og í bakgrunni sé svartur skuggi Íran þar sem hin sanna illska býr.
