Í frétt Norska ríkisútvarpsins (NRK) kemur fram að síðastliðinn sunnudag hafi verið kveikt í regnbogafána, helsta tákni hinsegin fólks, í sveitarfélaginu Seljord í suðurhluta Noregs. Fáninn hafði verið dreginn að húni við byggingu sem hýsir bæði grunn- og framhaldsskóla.

Atvikið var tilkynnt til lögreglu en það var bæjarstjórinn, Beate Marie Dahl Eide, sem leysti málið.

Hún segist hafa fengið símtal frá tveimur syndurum sem iðruðust mjög og játuðu að hafa tekið fánann niður og kveikt í honum. Hinir seku sögðu að ekkert hatur í garð hinsegin fólks hefði legið þar að baki. Þeir hafi einfaldlega framið verknaðinn í ölæði.

Bæjarstjórinn tekur orð tvímenninganna trúanleg og telur rétt að málið hafi ekki frekari afleiðingar fyrir mennina.

Kai Spurkland, saksóknari, er hins vegar á öðru máli. Þegar kveikt sé í regnbogafána sé mögulegt að um sé að ræða brot á norskum lögum um hatursorðræðu. Ef viðkomandi eigi ekki sjálfur fánann teljist einnig um að ræða skemmdarverk og þjófnað. Hann segir að lögregla geti haldið meðferð málsins áfram hvort sem eigandi fánans leggi fram formlega kæru eða ekki.

Enn sem komið er hefur kæra ekki verið lögð fram og rannsókn ekki verið hafin af hálfu lögreglunnar.

Samkvæmt NRK hefur það ekki verið fátítt í Noregi að kveikt sé í regnbogafánum. Árið 2021 hafi verið kveikt í þó nokkrum regnbogafánum við skólabyggingar í Osló. Skemmst er einnig að minnast að framin var skotárás á skemmtistað hinsegin fólks í Osló á síðasta ári með þeim afleiðingum að tveir létust.

Rætt er í fréttinni við blaðamanninn Gisle Agledahl sem hefur m.a. komið að skipulagningu gleðigöngu hinsegin fólks. Hann segir hinsegin fólk taka slík skemmdarverk á regnbogafánum afar nærri sér. Hann telur íkveikjuna í Seljord fela í sér ofbeldi og auka enn frekar á ótta hinsegin fólks, ekki síst eftir áðurnefnda skotárás. Þótt að þessi tiltekna íkveikja hafi líklega verið afleiðing heimskupara veki hún samt ugg í brjóst hinsegin fólks.