Hátt í fjórum árum eftir að unglingar á aldrinum 16 til 18 ára gerðust sekir um skelfilegt ofbeldisverk við Elliðavatn hefur dómur fallið í málinu.
Í september árið 2019 var ungur maður frelsissviptur í Heiðmörk við Elliðavatn. Þrír menn voru vegna atviksins ákærðir fyrir líkamsárás, frelsissviptingu og ólögmæta nauðung.
Í ákæru málsins sagði að frelsissviptingin hafi hafist stuttu eftir að brotaþolinn settist í aftursæti bíls við Árbæjarsafn í Reykjavík, sem einn hinna ákærðu ók. Hinir tveir komu út úr farangursrými bílsins og settust í aftursætið við hlið mannsins.
Þeir hótuðu að úða piparúða í augu hans og neyddu hann þannig til að aka með sér að sumarbústað við sunnanvert Elliðavatn og vera þar. Þar eru þeir sagðir hafa veist að honum með ofbeldi, úðað piparúða í augu hans og slegið hann víðsvegar um líkamann með stálkylfu.
Þeir eru síðan sagðir hafa neytt hann til að afklæðast og fara ofan í Elliðavatn með því að hóta honum frekari líkamsmeiðingum. Að því loknu óku þeir burtu og skildu hann eftir kaldan og blautan við Elliðavatn. Maðurinn er sagður hafa hlotið af árásinni yfirborðsáverka og marbletti á báðum handleggjum, vinstri öxl, vinstri fótlegg og á baki, marbletti á andliti og höfði og yfirborðsáverka á augnsvæði.
Málið kom loksins fyrir dóm um miðjan mars síðastliðinn. Unglingarnir sem frömdu þetta ofbeldisverk eru nú orðnir ungir menn. Dómur féll í byrjun apríl, í Héraðsdómi Reykjavíkur, en hann hefur ekki verið birtur á vefsíðu dómstólanna.
RÚV greindi hins vegar frá dómnum fyrir skömmu. Sá sem hlaut þyngstan dóm fékk 18 mánaða fangelsi. Annar hlaut fjögurra mánaða dóm en var þar horft til þess að hann var aðeins 16 ára þegar brotið var framið. Sá þriðji fékk 9 mánaða skilorðsbundið fangelsi.
Ennfremur voru mennirnir dæmdir til að greiða brotaþolanum 800 þúsund krónur í miskabætur.
