Hann komst lifandi í gegnum sex mánuði á vígvellinum í Úkraínu og fékk sakaruppgjöf að þeim loknum og sneri heim til Rússlands nýlega þegar sakaruppgjöfin var komin í hús.
Nú er Rossomakhin í haldi lögreglunnar, grunaður um að hafa myrt gamla konu nokkrum dögum eftir að hann sneri heim.
CNN segir að Rossomakhin hafi farið til heimabæjar síns, Novyj Burets í Kirov-héraðinu, eftir að hann fékk sakaruppgjöfina. Íbúar þar segja að hann hafi varla verið kominn heim þegar vandræði, tengd honum, hófust. Hann var handtekinn fimm dögum eftir heimkomuna eftir að hafa haft í hótunum við fólk.
Vegna vandræðanna, sem tengdust honum, var boðað til íbúafundar í ráðhúsi bæjarins á mánudag í síðustu viku. Þar sagði einn fundargesta að Rossomakhin hafi sést með heykvísl, exi og hníf og hafi haft í hótunum um að drepa alla.
Vadim Varankin, lögreglustjóri, sagði á fundinum að Rossomakhin væri þekktur vandræðagemsi og að tekið yrði á málum hans. En áður en það gerðist var gömul kona myrt í bænum. Böndin bárust fljótt að Rossomakhin, sem var handtekinn grunaður um morðið.
Yevgeny Prigozhin, eigandi Wagner, hefur tjáð sig um málið og sagði hann að fyrirtækið sé reiðubúið til að aðstoða lögregluna við málið. Hann sagði að láta verði Wagner vita ef fyrrum fangar, liðsmenn Wagner, sýni af sér árásargirni eða aðra aðfinnsluverða hegðun. Þá verði hópur frá Wagner sendur til að sækja viðkomandi og flytja aftur í fremstu víglínu í Úkraínu.
