Karlmaður var í dag dæmdur í þriggja og hálfs árs fangelsi í Héraðsdómi Reykjavíkur fyrir tilraun til manndráps og stórfelldar líkamsmeiðingar. Karl Ingi Vilbergsson, saksóknari hjá embætti héraðssaksóknara staðfestir þetta í frétt mbl.is.
Maðurinn réðst á tvo samstarfsfélaga sína á þjóðhátíðardaginn 17.júní á Seltjarnarnesi og hefur hann setið í gæsluvarðhaldi síðan. Mun hún koma til frádráttar fangelsisvistinni. Héraðssaksóknari fór fram á fimm ára fangelsisdóm en dómstóllinn féllst ekki á þá kröfu. Óvíst er hvort dómnum verði áfrýjað til Landsréttar.
Annar þolenda mannsins þríhöfuðkúpubrotnaði. Sá heitir Omar Alraham, en hann er 41 árs gamall maður frá Írak. sem búsettur er í Hafnarfirði með fjölskyldu sinni. Hann lýsti árásinni í samtali við DV viku eftir árásina en hún átti sér stað á byggingasvæði á Seltjarnarnesi þar sem Omar var við vinnu.
Hann greindi frá því að hann hafi kropið niður við bílhjól að huga að dekki á bíl sínum sem var í ólagi og muni svo næst eftir sér á sjúkrahúsi umkringdur heilbrigðisstarfsfólki og lögreglumönnum. Síðar kom í ljós að vinnufélagi hans hafði ráðist aftan að honum og barið Omar í höfuðið með klaufhamri og jarðhaka. Árásarmaðurinn hafi svo snúið sér að öðrum vinnufélaga þeirra og lamið hann með sama klaufhamri.
Árásin átti sér stað um morguninn og hlaut Omar þrjú brot á höfuðkúpu og sár á höfði, rifbeinsbrot og löskun á hægri hendi. Auk þess var árásin honum mikið áfall.
„Vinur minn var að hjálpa mér eitthvað með dekkið. Ég beygði mig niður. Ég sá að einhver gekk aftur fyrir mig. Svo man ég ekki neitt þar til ég vakna allt í einu á spítalanum. Ég spurði: Hvað gerðist eiginlega?“