Heimsmeistaramótið í knattspyrnu hófst í Katar í gær en í aðdraganda mótsins hefur borið á mikilli gagnrýni varðandi mótsstaðinn og raddir um einhverskonar sniðgöngu mótsins hafa verið háværar. Gagnrýnin hefur í raun staðið yfir síðan 2. desember árið 2010 en þá tilkynnti alþjóða knattspyrnusambandið FIFA að mótið yrði haldið í Persaflóaríkinu. Fóru strax af stað sögusagnir um mútur og spillingu en einnig vangaveltur um það hvernig halda ætti heimsmeistaramót í landi eins og Katar þar sem innviðir voru varla til staðar til að halda slíkt mót.
Katarbúar blésu í herlúðra og settu umfangsmiklar byggingaframkvæmdir í gang. Þá hófst fréttaflutningur um meint mannréttindabrot á farandverkamönnum og að allt að 6.500 slíkir hafi látið lífið við byggingu á völlum og öðrum byggingum fyrir mótið. Þeir sem hafa freistað þess að verja Katarbúa hafa bent á að sú tala byggist á andlátum á heilum áratug og halda því fram að dánartíðnin sé ekki fjarri því að vera eðlileg miðað við að 2 milljónir farandverkamanna hafa starfað í landinu hverju sinni.
Þeir sem verja þá staðreynd að viðburðurinn sé í Katar hafa einnig bent á að hann hafi stuðlað að mikilvægum umbyltingum í Katar og ýtt undir samtal sem verði til góðs.
RÚV sér um umfjöllun á mótinu hér á landi og hefur ríkisfjölmiðillinn fengið á sig nokkra gagnrýni fyrir það. Hafa margir meðal farið fram á það að RÚV sniðgangi keppnina . Þorkell Gunnar Sigurbjörnsson, íþróttafréttamaður RÚV, opnaði á umræðu um þessa gagnrýni með færslu sem hann birti á samfélagsmiðlinum Twitter í gær.
„Auðvitað gagnrýnum við mannréttindabrot og spillingu tengdu HM í Katar, sem hefði aldrei átt að fara fram þar. En hvar var samt þessi gagnrýni á Rússland fyrir HM 2018? Rússar höfðu þá innlimað Krímskaga með hervaldi. Þar er hinsegin fólk fangelsað og rasismi viðgengst á völlunum,“ segir Þorkell í færslunni.
Það leið ekki langur tími þar til fólk fór að svara Þorkelli í athugasemdunum. Einn þeirra sem tekur til máls er fjölmiðlamaðurinn Máni Pétursson. „Þetta er á öðrum skala,“ segir Máni í sinni athugasemd.
„Alveg sorglegt að ríkistjórnarsjónvarpið sé að reyna að hagnast á þessu. Við sem höfum einhverja sómakennd getum ekki einu sinni sagt þessu upp.“
Þorkell svarar Mána og segir að sér detti ekki í hug að mótmæla því að þetta sé á öðrum skala. „Hef hvergi varið þá ákvörðun að HM sé í Katar,“ segir Þorkell svo.
„Hvað RÚV á auglýsingamarkaði varðar veistu vel að það eru umræður sem þú þarft að taka við þingmenn sem setja íslensk lög, en ekki við mig almennan starfsmann hjá RÚV.“
Í athugasemdunum er bent á að mótið í Rússlandi hafi einnig verið gagnrýnt á sínum tíma. Maður nokkur segist til dæmis hafa unnið miða á leik Íslands og Argentínu en að hann hafi ákveðið að sleppa því að fara. Hann segir að á endanum hafi hann ekki getað hugsað sér að „fara til Moskvu til að hafa gaman“.
Þorkell svaraði þessum punkti í athugasemd við færslu sína: „Jú, vissulega einhver gagnrýni þá. En þar hótaði fólk ekki í stórum stíl að sniðganga og þar fram eftir götunum. Of gaman því Ísland var með? Kannski hefur siðferðisvitund fólks bara batnað síðan þá. Skal ekki segja.“