Verðbólgudraugurinn hrellir marga þessa dagana og framfærslukostnaður fer hækkandi að því virðist með hverjum deginum. Íbúar Bretlands finna mikið fyrir þessu, með hækkandi rafmagnskostnaði hafa margir þurft að grípa til örþrifaráða, eins og að hætta að borga klámstjörnum pening í hverjum mánuði.
Klámstjarnan Fenella Fox segir nefnilega í samtali við Daily Star að þeim fjölgi sem segja upp áskrift að OnlyFans síðunni hennar. Hún telur að rekja megi ástæðuna fyrir því til verðbólgunnar. Fox, sem er 28 ára gömul, varð nokkuð fræg á OnlyFans en hún markaðssetti sig sem „náttúrulega“ klámstjörnu. Í dag er OnlyFans síðan hennar á meðal þeirra vinsælustu í heiminum.
Fox hefur þó tekið eftir því að karlmenn eru farnir að skera niður í klámdálkinum í rekstrarkostnaðinum hjá sér. Hún hefur gripið til annarra ráða en tíðkast hjá þeim sem selja áskriftir, yfirleitt fer verðið á þeim hækkandi þegar illa gengur en hún ákvað hins vegar að lækka verðið hjá sér umtalsvert. Mánaðaráskrift að síðunni hennar kostaði 22 pund, um 3.500 í íslenskum krónum, en í dag kostar hún aðeins 4 pund, um 650 krónur.
„Ég þurfti að breyta öllu verðlaginu hjá mér. Til dæmis er ég ekki lengur að selja myndbönd á 17 pund heldur á 15, 13 punda myndbönd kosta núna 10 pund og 9 punda myndböndin eru komin í 8 pund,“ útskýrir hún. „Ég hef líka tekið eftir því að ég er ekki að fá áskrifendur sem eru til í að borga 22 pund en fyrir nokkrum árum var ég með hundruðir áskrifenda sem borguðu 35 pund fyrir áskriftina!“
Þá segir Fox að hún hafi ekki náð að hækka launin sín vegna þessa en reikningarnir hennar hafa líka hækkað eins og hjá öðrum. „Leigan mín er búin að hækka og mér leið eins og leigusalinn minn vildi fá mig í burtu til að geta hækkað hana ennþá meira,“ segir hún.
„En ég náði að semja við hann og borga núna 1.845 pund á mánuði [um það bil 300 þúsund í íslenskum krónum] sem er frekar mikið að mínu mati þar sem þetta er bara tveggja svefnherbergja íbúð.“
Þó svo að hart sé í árinni hefur Fox náð að finna leiðir til að eiga fyrir salti í grautinn. Hún segir að neysluvenjur áskrifenda hennar hafi breyst og hefur hún gert sitt besta í að fylgja þeim. „Mér líður eins og fleiri vilji mjög gróft efni núna,“ segir hún.
