Navalny afplánar nú fangelsisdóm í Rússlandi og er fyrir dómi þessa dagana þar sem saksóknarar krefjast þungs dóms yfir honum. Sakargiftir eru frekar vafasamar að flestra mati og fáum dylst að saksóknarar ganga hér erinda Pútíns sem telur Navalny einn hættulegasta andstæðing sinn. Skemmst er að minnast þess þegar útsendarar yfirvalda reyndu að myrða hann með eitri. Hann lifði þá morðtilraun naumlega af.
Navalny stofnaði samtök gegn spillingu og eins og gefur að skilja eru slík samtök ráðamönnum í Kreml mikill þyrnir í augum þar sem þeir keppast hver við annan við að maka krókinn og arðræna rússnesku þjóðina.
Vladimar Ashurkov, forstjóri samtaka Navalny, segir að hernaður Rússa í Úkraínu sé mjög óvinsæll meðal Rússa og að hann muni á endanum verða til þess að Pútín hrekist frá völdum því almenningur muni finna svo vel fyrir refsiaðgerðum Vesturlanda.
„Stríðið er ekki vinsælt og efnahagsleg niðursveifla verður ekki vinsæl. Hún mun flýta fyrir falli stjórnar Pútíns,“ sagði hann um áhrif refsiaðgerðanna. Hann sagði að reikna megi með vaxandi óánægju meðal kaupsýslufólks og elítunnar og mikillar óánægju meðal almennings: „Ég held að þetta muni leiða af sér miklar pólitískar breytingar.“
„Ég held að líklega munum við sjá raunverulegar breytingar á ríkisstjórn innan fimm ára. Hvað mun það kosta okkur? Hvernig mun það gerast? Það mun tíminn leiða í ljós,“ sagði hann einnig.
Samtök Navalny hafa afhjúpað mörg dæmi um spillingu í Rússlandi, þar á meðal um eignir Pútíns. Samtökin voru bönnuð í lok síðasta árs og stimpluð sem öfgasamtök. Ashurkov er í útlegð í Bretlandi og heldur starfsemi samtakanna gangandi þaðan.
