Fréttablaðið skýrir frá þessu í dag. Haft er eftir Karli að hraðpróf og sjálfspróf séu óáreiðanlegri en PCR-próf sem hafa aðallega verið notuð hér á landi fram að þessu. Hann sagði að sjálfsprófin væru óáreiðanlegri en hraðprófin. Hann sagði helstu takmörkun hraðprófanna vera að þau séu ekki nægilega næm og greini því ekki alla sem eru smitaðir af COVID-19.
„Næmi prófanna fer eftir veirumagni í nefkokinu. Því meira magn veira, því meira smitandi er viðkomandi einstaklingur og hraðprófið því líklegra til að verða jákvætt. Hjá einstaklingum með mikið veirumagn getur næmið verið allt að 100 prósent, en hjá þeim sem eru með minna veirumagn getur næmið farið vel niður fyrir 50 prósent,“ sagði hann.
Hann sagði að niðurstöður hraðprófa geti því veitt falska, neikvæða niðurstöðu sem geti veitt falskt öryggi og fari fólk þá ekki í einangrun og haldi áfram að smita.