Magnús Kjartan Eyjólfsson, forsöngvari og gítarleikari Stuðlabandsins frá Selfossi mun stýra Brekkusöngnum á Þjóðhátíð í ágúst.

Þetta kemur frama í tilkynningu sem send var fjölmiðlum rétt í þessu. Þar segir:

„Magnús hefur um árabil verið einstaklega eftirsóttur trúbador samhliða því að spila með hljómsveit sinni vítt og breitt um landið við hin ýmsu tilefni og meðal annars komið fram á Þjóðhátíð óslitið síðan 2016.“

Til stóð að tónlistarmaðurinn Ingólfur Þórarinsson (Ingó Veðurguð) sæi um Brekkusönginn en hann var afbókaður eftir að umræða fór af stað um meint brot Ingólfs gegn konum. Sú ákvörðun hefur vakið mikla athygli. Meðal annars barst Þjóðhátíðarnefnd undirskriftalisti um 1600 einstaklinga sem kröfðust þess að Ingó yrði endurráðinn. Nú er ljóst að ekkert verður af slíku og hefur Magnúsi verið falið verkið.

Landsmönnum sem ekki leggja leið sýna til Vestmannaeyja geta fylgst með Brekkusöngnum í gegnum lifandi streymi í gegnum netið eða með myndlyklum Vodafone og Símans. Verð fyrir netstreymi er 2.900 og 3.400 fyrir myndlykla. Hægt er að kaupa sér aðgang hér.

Þeir listamenn sem búið er að tilkynna að komi fram á hátíðinni eru:

Bríet – Aron Can – FM95Blö – DJ Muscleboy – Emmsjé Gauti – Aldamóta tónleikarnir – Cell 7 – Herra Hnetusmjör – Jóhanna Guðrún – Bandmenn – Stuðlabandið

Fleiri listamenn verða svo kynntir í lok vikunnar.