Magnús Tumi sagði að dregið hafi úr skjálftavirkni og gliðnun landsins. Tveir möguleikar eru í stöðunni að hans sögn: „Að þetta sé að verða búið. En hitt er alveg eins líklegt, að kvikan sé núna búin að ryðja frá sér þar sem hún getur og fer þá að leita upp.“
Að mati Magnúsar hafa sextíu milljón rúmmetrar af kviku safnast fyrir undir eldstöðinni á þeim þremur mánuðum sem eru liðnir frá goslokum í september. „Það er bara jafnmikið aðrennsli kviku og var að streyma upp í gosinu,” sagði hann.
Hann benti á mat sérfræðinga Veðurstofunnar um að kvikan sé á um tveggja kílómetra dýpi og að hún geti verið fljót að brjótast upp á yfirborðið: „Það gæti verið nokkrir klukkutímar. Það gæti verið nokkrir dagar. Það gæti líka, svo undarlegt sem það virðist, að þetta væri bara búið núna.“
Hvað varðar hvar hugsanlegt gos verði þá sagðist hann telja langlíklegast að það verði á sama stað og síðast eða þar nærri.