Sendiráð Íslands í Osló í Noregi hefur birt tilkynningu til Íslendinga sem búsettir eru í Kongsberg í Noregi, þar sem hryðjuverk var framið í dag þar sem minnst fjórir létust, um að láta vita af sér.
Tilkynningin birtist á Facebook-síðu sendiráðsins:
„Íslendingar í Kongsberg í Noregi: látið aðstandendur vita ef það er í lagi með ykkur en hafið samband við neyðarnúmer borgaraþjónustu, +354 545-0112 ef aðstoðar er þörf. Sendiráðið fylgist vel með framvindu mála í Kongsberg. Virðið lokanir og tilmæli yfirvalda og fylgist með staðbundnum fjölmiðlum. Mikið álag er á símkerfi borgarinnar þessa stundina og því best að nota samfélagsmiðla til að láta vita af sér.
Við munum birta frekari upplýsingar eftir atvikum.“
Nokkur fjöldi Íslendinga býr í Kongsberg. Ekki er vitað til að Íslendingur hafi slasast eða látist í árásinni í dag og hefur DV haft spurnir af nokkrum sem eru heilir á húfi en vilja ekki tjá sig um ástandið í bænum á þessum viðkvæma tímapunkti.
Íbúatala í Kongsberg er um 27.000.