Miðað við að það var föstudagur í gær var ekki rosalega mikið að gera hjá lögreglunni í nótt. Lítið var til dæmis um útköll vegna ölvunar og láta en það má að öllum líkindum reka það til kórónuveirunnar og samkomutakmarkana.
Það var þó ekki alveg tíðindalaust hjá lögreglunni í nótt. Eitthvað var um þjófnað, tilkynnt var um þjófnað í tveimur verslunum í Reykjavík í gærkvöldi og í einni líkamsræktarstöð.
Einstaklingur var síðan til vandræða á hóteli í 105 Reykjavík en óskað var aðstoðar lögreglu vegna einstaklingsins sem neitaði að yfirgefa hótelið. „Einstaklingurinn í annarlegu ástandi og grunaður um líkamsárás og er hann vistaður í fangaklefa,“ segir í tilkynningu lögreglu vegna málsins.
Í Kópavoginum voru tvær bifreiðar stöðvaðar þar sem ökumennirnir voru grunaðir um akstur undir áhrifum fíkniefna. Annar ökumannanna var einnig grunaður um vörslu fíkniefna en hinn ökumaðurinn var ekki með ökuréttindi. Þá var ein bifreið stöðvuð í Hafnarfirði þar sem ökumaður var grunaður um ölvunarakstur, sá ökumaður var einnig án ökuréttinda.
Í 110 Reykjavík var bifreið stöðvuð en ökumaður bifreiðarinnar er grunaður um að hafa verið að selja áfengi úr bifreiðinni. Lögreglan lagði hald á töluvert magn af áfengi vegna málsins.