Á sjötta tímanum í gær var maður handtekinn í miðborginni en hann er grunaður um að hafa kýlt konu í andlitið. Samkvæmt tilkynningu sem lögreglunni barst kýldi maðurinn konuna í andlitið og fór síðan á brott. Skömmu síðar kom hann aftur að heimili hennar og var þá handtekinn. Hann var vistaður í fangageymslu vegna rannsóknar málsins.

Um klukkan eitt í nótt kom eldur upp í bifreið í Breiðholti. Eigandinn hafði verið að gera við hana þegar eldur kviknaði í vélarrými. Búið var að slökkva eldinn með handslökkvitæki þegar lögreglan kom á vettvang. Skemmdir virtust vera litlar.

Á níunda tímanum í gærkvöldi var ölvuð eldri kona staðin að því að reyna að fara með kerru fulla af vörum út úr verslun í Árbæ en hún hafði ekki greitt fyrir þær.

Tveir ökumenn voru handteknir síðdegis í gær og gærkvöldi grunaðir um að vera undir áhrifum fíkniefna.

Einn ökumaður var kærður fyrir að aka sviptur ökuréttindum.