Á níunda tímanum í gærkvöldi var tilkynnt umferðaróhapp í Vesturbænum og að tjónvaldur hefði ekið á brott frá vettvangi. Bifreið hans fannst skömmu síðar og voru þrír menn handteknir vegna málsins. Þeir eru grunaðir um brot á skyldum vegfarenda við umferðaróhapp, akstur bifreiðar undir áhrifum fíkniefna, akstur bifreiðar sviptir ökuréttindum, vörslu fíkniefna og fleira. Þeir voru allir vistaðir í fangageymslu.

Á ellefta tímanum í gærkvöldi var tilkynnt um falsaðan peningaseðil í verslun í Breiðholti. Hald var lagt á seðilinn og er málið í rannsókn.

Síðdegis í gær kom maður að bifreið sinni, sem var lagt í Bústaðahverfi, og var búið að stela hvarfakút undan bifreiðinni. Hún hafði staðið í stæðinu síðan á föstudag.

Á milli klukkan 19.00 og 22.30 var tilkynnt um innbrot í bifreiðar í miðborginni. Rúður höfðu verið brotnar í þeim og verðmætum stolið úr þeim.

Skráningarnúmer voru fjarlægð af einni bifreið í Vesturbænum í gærkvöldi eftir að í ljós kom að hún var ótryggð.

Einn ökumaður var handtekinn í nótt, grunaður um að vera undir áhrifum áfengis og fíkniefna.